1.02.2019, 15:41
Қараулар: 4
Салықтағы өзгерістер айтылды

Салықтағы өзгерістер айтылды

Елбасымыздың тапсырмалары негізінде ҚР Салық кодексіне өзгерістер енгізілгені мәлім. Мұндағы мақсат – халықтың әлауқатын жақсарту, еліміздегі шағын және орта бизнес өкілдеріне қолдауды күшейту. Аудан орталығында БҚО бойынша Мемлекеттік кірістер департаменті мемлекеттік қызмет көрсету басқармасының басшысы Тимур Төлепов, жанама салықтарды әкімшілендіру басқармасының бас маманы Дина Қажығалиева, түсіндіру басқармасының басшысы Айман Қуанованың қатысуымен өткен семинарда кәсіпкерлерге, қаржы қызметкерлеріне сол өзгерістердің қыр-сыры жайында кеңінен баяндалды.

Салық төлеушілер Қазақстан аумағында қызметін жүзеге асырғанда ақшалай есеп айырысулар кезінде деректерді тіркеу немесе беру функциясы бар бақылау-касса машиналарын қызмет түрлеріне қарай (бұл қызмет түрлері Қаржы министрінің бұйрығымен бекітілген) алдағы 1 сәуірден бастап, 1 шілдеден бастап, сондай-ақ 1 қазаннан бастап қолданатыны жайында, ағымдағы жылы тіркелген онлайн бақылау-касса машинасының жеңілдіктері туралы сөз болып, сұрақтарға жауап қайтарылды.

ара барысында сондай-ақ бірыңғай жиынтық төлемді кімдер төлейтіндігі жайында айтылды. Бұл формальды емес жұмыспен қамтылған халыққа, яғни ауыл шаруашылығы, қызмет көрсету салаларында еңбек етушілерге ұйымдастырушылық, құқықтық мүмкіндік беретін арнайы бағыт болып табылады. Мұнда салық сомасы азырақ, салық пен әлеуметтік төлемдерден тұратын бірыңғай төлем жасауға болады, салық бойынша есеп беру, салықтық тексерулер және әкімшілік жазалар қарастырылмаған. Сонымен қатар елді мекендердегі тұрғындардың жүктемесін азайту мақсатында, бұл төлемді айлық есептік көрсеткіштің жартысына дейін қысқарту ұсынылған. БЖТ төлеу қызметті автоматты түрде тіркеуге және медициналық әлеуметтік сақтандыру, зейнетақымен қамтамасыз ету жүйесіне қатысуға мүмкіндік береді. Бірыңғай жиынтық төлем өзімен төрт төлемді біріктіретін бір төлемдік бірыңғай құқықтық тәртіп (жеке табыс салығы, міндетті зейнетақы жарналары, әлеуметтік-медициналық сақтандыру қорының жарналары және мемлекеттік әлеуметтік сақтандыру қоры). БЖТ қалалық жерлерде бір айлық есептік көрсеткіш (2019 жылға АЕК – 2525 теңге), ауылдық мекендерде 0,5 айлық есептік көрсеткіш. Басқосуда сонымен қатар салықтық рақымшылыққа түсінік беріліп, елімізде жалпыға бірдей декларациялау 2020 жылы басталатындығы туралы айтылды.

Қайрат ҚАПАН, 

аудандық мемлекеттік кірістер басқармасының бөлім басшысы