11.01.2021, 9:46
Қараулар: 176
Спорттың бұқаралылығы назарда

Спорттың бұқаралылығы назарда

Жаңа жылдың қарсаңңында аудан әкімі Қалияр Айтмұқамбетов спортшылар және сала ардагерлерімен кездесті.

Жүздесуде Қалияр Шадиярұлы бұқаралық спортты дамытуда атқарылған игі істер жайында біраз деректер келтірді. Аудандағы 18 ауылдық округ орталықтары заманауи спорт алаңдарымен  қамтылды. Аудан орталығында құрылысы басталған дене шынықтыру және сауықтыру кешенінің ашылуы келер жылдың еншісінде. Келешекте тап осындай нысанды Тайпақ ауылында да салу жоспарда.

Бұқаралық спортты дамыту бойынша ауданда балалар-жасөспірімдер спорт мектебі мен «Жігер» спорт клубы жұмыс істейді. Қазіргі таңда аталмыш мектепте 13 спорт түрінен 1042 жасөспірім жаттығуда. Індеттің салдарынан бұқаралық спорт шараларын өткізу шектелгенмен, түрлі  жарыс, біріншіліктер қашықтан ұйымдастырылып, енді біреулері көрерменсіз өткізілуде. Осындай жетістіктерді тілге тиек еткен аудан басшысы алдағы жылға межелеген жоспарлармен де бөлісті.

Шара аясында  бұқаралық спортты дамытуға қосқан үлестері үшін аудан әкімінің алғыс хатымен бірқатар дене шынықтыру пәндерінің мұғалімдері мен жаттықтырушылар, спорт ардагерлері, спортшылар марапатталды.

Шара спорттық ойындармен жалғасты.

Ләззат ӨТЕГЕНОВА